Gjermania kryeson me numrin më të lartë të votuesve nga diaspora për zgjedhjet e 9 shkurtit në Kosovë

Më shumë se 100 mijë shtetas të Kosovës që jetojnë jashtë vendit janë regjistruar për të votuar në zgjedhjet parlamentare, të cilat do të mbahen më 9 shkurt. Procesi i votimit për diasporën ka nisur sot dhe do të vazhdojë deri më 8 shkurt.

Sipas të dhënave të publikuara nga Komisioni Qendror i Zgjedhjeve (KQZ), 105 mijë qytetarë nga diaspora janë regjistruar për të votuar. Gjermania kryeson me numrin më të lartë të votuesve jashtë vendit, me mbi 44 mijë të regjistruar, sipas një infografike të publikuar nga Radio Evropa e Lirë.

Shumica e votuesve të regjistruar (84,525) kanë zgjedhur të votojnë përmes postës. Nga këta, 67,421 do të dërgojnë fletëvotimet nga jashtë, ndërsa 17,104 do t’i dërgojnë ato në adresën postare të KQZ-së brenda Kosovës.

Përveç votimit me postë, qytetarët e diasporës kanë mundësinë të votojnë fizikisht në përfaqësitë diplomatike dhe konsullore të Kosovës më 8 shkurt, një ditë para mbajtjes së zgjedhjeve në vend.

Kjo shifër e lartë e regjistrimeve nga diaspora dëshmon për interesimin e qytetarëve të Kosovës që jetojnë jashtë vendit për të marrë pjesë në proceset demokratike të atdheut të tyre.