Amazon njeh zyrtarisht Kosovën dhe e përfshin në platformat e saj

Kosova tashmë është përfshirë zyrtarisht në të gjitha platformat e Amazon, duke shënuar një hap të rëndësishëm në transformimin digjital dhe zhvillimin ekonomik të vendit. Kjo arritje është rezultat i takimeve të nivelit të lartë të mbajtura në tetor 2024 në Washington D.C., mes presidentes Vjosa Osmani-Sadriu dhe përfaqësuesve të Amazon.

Në një deklaratë të përbashkët të Zyrës së Presidencës dhe Odës Ekonomike Amerikane, u theksua se përfshirja e Kosovës në Amazon është një sukses i përpjekjeve të Task Forcës për Diplomacinë Digjitale, një iniciativë e mbështetur nga Ambasada Amerikane në Prishtinë.

“Prania në platformat e Amazon i jep mundësi bizneseve dhe individëve kosovarë të zgjerojnë tregun dhe të promovojnë produktet e tyre në nivel global. Gjithashtu, konsumatorët nga Kosova mund të përfitojnë nga qasja e drejtpërdrejtë në shërbimet e Amazon, përfshirë Amazon Web Services (AWS) dhe Amazon Alexa. Ky hap është një dëshmi e fuqisë së diplomacisë dhe bashkëpunimit publiko-privat për të avancuar zhvillimin ekonomik të Kosovës,” thuhet në njoftim.

Presidentja Osmani, në bashkëpunim me Odën Ekonomike Amerikane, vijon diskutimet me platforma të tjera të rëndësishme globale, duke synuar të forcojë më tej ekosistemin digjital dhe potencialin ekonomik të vendit.