Stabiliteti rajonal/ Kryeministri japonez viziton SHBA-në, çfarë pritet të ndodhë në takimin me Trump

Kryeministri japonez Shigeru Ishiba do të takohet me presidentin amerikan Donald Trump gjatë një vizite në Shtetet e Bashkuara këtë javë, deklaroi zëdhënësi i qeverisë Yoshimasa Hayashi.

“Nëse kushtet e lejojnë, Ishiba do të vizitojë Shtetet e Bashkuara nga data 6 deri më 8 shkurt dhe do të takohet me Presidentin Trump në Uashington. Përmes kësaj vizite, ne shpresojmë të ndërtojmë një marrëdhënie të fortë besimi me administratën e re amerikane dhe të përmirësojmë aleancën midis SHBA-së dhe Japonisë” tha ai.

Shigeru Ishiba pati një bisedë të shkurtër telefonike nëntorin e kaluar me Trump, i cili ende nuk ishte betuar si president dhe kërkoi ta takonte atë në janar përpara se të merrte detyrat presidenciale.  Por takimi nuk u realizua.

Javën e kaluar, Shigeru Ishiba theksoi rëndësinë e marrëdhënieve të ngushta me SHBA-në për stabilitetin rajonal.

Japonia dhe SHBA janë aleatët kryesorë të mbrojtjes, dhe investitorët kryesorë të huaj të njëri-tjetrit.