Shkrepje me armë zjarri në Prishtinë, ka të lënduar

Sot, në rrugën “Hilë Mosi” në kryeqytet, ka ndodhur një përleshje mes disa personave, ku dyshohet se është shkrepur armë zjarri.

Sipas Policisë, një numër i pacaktuar i personave të dyshuar janë shoqëruar në stacion policor, ndërsa një armë është sekuestruar.

Të lënduarit janë trajtuar në Qendrën Klinike Universitare të Kosovës (QKUK). “Policia ka dalë menjëherë në vendin e ngjarjes dhe ka ndërmarrë veprime të shumta hetimore dhe operativo-hetimore. Këto veprime kanë çuar në identifikimin, lokalizimin dhe arrestimin e disa personave të dyshuar për përfshirje në rastin e raportuar. Të lënduarit janë dërguar për trajtim mjekësor,” thuhet në njoftimin zyrtar të Policisë.

Ndërkohë, është identifikuar edhe një automjet i dyshuar, i cili është ndaluar dhe kontrolluar nga policia. Aktualisht, vijojnë hetimet për të sqaruar në tërësi rrethanat e ngjarjes.