Rama për bllokimin e TikTok-ut: Liria e shprehjes nuk do të zhduket pa të

Kryeministri i Shqipërisë, Edi Rama, ka deklaruar se qeveria po shqyrton bllokimin e platformës TikTok për një vit, duke e cilësuar këtë si një hap për të adresuar shqetësimet e sigurisë dhe ndikimin negativ në shoqëri. Vendimi vjen pas një ngjarjeje tragjike, që përfshiu vrasjen e një 14-vjeçari dhe përhapjen e përmbajtjeve që promovojnë krimin në këtë platformë.

Në një intervistë për Politico, Rama theksoi se vendimi nuk është i bazuar vetëm në këtë incident, por reflekton një “model shumë shqetësues” të sjelljeve që janë vërejtur në TikTok.

“Liria e shprehjes dhe mundësitë për marketing nuk do të zhduken pa TikTok,” deklaroi Rama, duke shtuar se vendimi është në përputhje me dëshirat e shumicës së prindërve dhe përbën një pjesë të strategjisë më të gjerë për rritjen e sigurisë në shkolla dhe mbrojtjen e të rinjve.

Ndërkohë, Komisioni Evropian ka reaguar me shqetësim ndaj këtij propozimi dhe po monitoron nga afër procesin e anëtarësimit të Shqipërisë në Bashkimin Evropian. Sipas zyrtarëve të BE-së, ky vendim do të vlerësohet për të përcaktuar nëse respekton standardet e lirisë së shprehjes dhe të drejtave civile.