Policia apelon për kujdes: Mjegull e dendur në disa zona në Kosovë

Policia e Kosovës ka njoftuar për praninë e mjegullës së dendur në zona me pozita të ulëta gjeografike, duke bërë apel për kujdes të shtuar nga drejtuesit e automjeteve.

Në njoftim, policia ka dhënë disa rekomandime për ngasje të sigurt në kushte me mjegull:

• Përdorni dritat e mjegullës nëse i ka automjeti juaj, për të përmirësuar dukshmërinë dhe për t’u bërë më të dukshëm për të tjerët.

• Mos përdorni drita të gjata, pasi ato mund të reflektojnë nga mjegulla dhe të zvogëlojnë dukshmërinë.

• Mbani distancën e duhur mes automjeteve dhe kontrolloni shpejtësinë e lëvizjes.

• Mbani krahun e djathtë të rrugës për të shmangur rreziqet.

• Shmangni shpejtësinë e tepërt dhe kushtojini vëmendje ndryshimeve të papritura në dukshmëri, sidomos pranë lumenjve ku mjegulla është më e dendur.

Policia rikujton se mjegulla mund të krijojë iluzione optike, duke bërë që shoferët të perceptojnë gabimisht shpejtësinë e tyre. Kujdesi maksimal është i domosdoshëm për të shmangur aksidentet në këto kushte atmosferike.