Mëngjesi me mjegull, Policia del me apel për shoferët

Instituti Hidrometeorologjik i Kosovës ka njoftuar se sot gjatë ditës do të mbajë mot me diell dhe vranësia të pjesshme.

Në mëngjes parashihet që në shumë vende, kryesisht viseve të larta dhe rreth lumenjve, të ketë mjegull.

Policia bën apel për kujdes gjatë vozitjes. Policia e Kosovës rekomandon:

– Mos harroni se ngasja në mjegull mund të jetë e rrezikshme!

– Mbani në vëzhgim rrugën për ndryshime të papritura të dukshmërisë, mjegulla më e dendur mund të jetë më afër lumenjve.

– Përdorni dritat e mjegullës. Nëse automjeti juaj i ka këto drita, kjo ju ndihmon të ndriçohet rruga para jush dhe këto drita e bëjnë automjetin tuaj më të dukshëm për shoferët tjerë. Disa automjete kanë edhe dritat e pasme të mjegullës, të cilat ndihmojnë shoferët që lëvizin mbrapa t’ju shohin juve edhe nga një distancë më e madhe.

– Mjegulla mund të krijojë një iluzion optik dhe t’i bëjë shoferët të mendojnë se po shkojnë më ngadalë seç janë. – Mbani vëmendjen, mos shpejtoni!

– Ndizni dritat gjatë ngasjes, por mos ndizni dritat me rreze të gjatë!

 – Ngasja e automjetit me drita të gjata mund të reflektojë jashtë mjegullës dhe mund të kthehet në automjetin tuaj, e cila gjithashtu e bën të pamundur që shoferët tjerë t’ju shohin.

– Mbani ndezur dritat e shkurtra dhe të mjegullës!

– Mbani nën kontroll shpejtësinë e lëvizjes!

– Mbani krahun e djathtë të rrugës gjatë lëvizjes!

Drejtoria Rajonale e Policisë inkurajon të gjithë shoferët të respektojnë këto rekomandime për sigurinë e tyre dhe të të tjerëve.