Kyle Walker drejt largimit, Man City e ‘zëvendëson’ me yllin e Juventus-it

Skuadra e Pep Guardiola-s është në kërkim të një mbrojtësi të nivelit të lartë për sezonin e ardhshëm.

Manchester City tashmë po shikon merkaton e verës dhe objektivi kryesor duket të jetë Andrea Cambiaso, lojtari i Juventus-it, i cili mund të bëhet zëvendësuesi ideal i Kyle Walker-it, tregojnë raportet nga Anglia.

Mbrojtësi anglez, pas një paraqitje të parregullt këtë sezon, duket se po jeton muajt e fundit me “Qytetarët”, gjë që e ka detyruar klubin të kërkojë një zëvendësues në nivelin e kërkesave të Pep Guardiola-s.

Cambiaso, 24 vjeç, ka treguar shkathtësi mbresëlënëse te Juventus-i, duke qenë në gjendje të luajë si në krahun e djathtë ashtu edhe në krahun e majtë, duke e bërë atë një opsion shumë tërheqës për skemën taktike të Guardiola-s.

Aftësia e tij për t’u përshtatur me role të ndryshme në fushë ka tërhequr vëmendjen jo vetëm të City-t, por edhe të gjigantëve të tjerë evropianë si Real Madrid-i.

Megjithatë, Juventus-i nuk është i gatshëm të ndahet lehtësisht nga mbrojtësi italian. Cambiaso së fundmi rinovoi kontratën e tij deri në vitin 2029 dhe klubi torinez e konsideron atë një pjesë kyçe në projektin e tyre afatgjatë.

Kjo situatë mund të komplikojë aspiratat e City-t, i cili do të ishte i gatshëm të bënte një ofertë të konsiderueshme për të provuar të bindë “Zonjën e Vjetër”.

Ndërkohë, kërkimi i një zëvendësuesi për Walker-in është prioritet në Mançester. Përveç Cambiaso-s, City po monitoron nga afër edhe mbrojtësit e tjerë të krahut, si Jeremie Frimpong dhe Rayan Ait-Nouri.

Megjithatë, profili i lojtarit të Juventus-it duket se përshtatet në mënyrë të përkryer me vizionin e Guardiola-s për të forcuar mbrojtjen e tij për sezonin e ardhshëm.