Arrestohet një i dyshuar për terrorizëm në Prishtinë

Policia e Kosovës ka arrestuar një person të dyshuar për përfshirje në veprimtari kriminale, duke përfshirë armëmbajtje pa leje, posedim të narkotikëve dhe përgatitje të veprave terroriste ose veprave penale kundër rendit kushtetues dhe sigurisë së Republikës së Kosovës.

Sipas njoftimit zyrtar të Policisë, gjatë një operacioni kontrolli në banesën dhe objektet përcjellëse të të dyshuarit, i cili është shtetas kosovar, janë gjetur dhe sekuestruar tri armë zjarri (të tipit zolla), gjashtë fishekë specialë, pesë fishekë të tjerë, 269.3 gramë substancë të dyshuar narkotike (marihuanë), një peshore elektronike, një USB, një mulli për bluarje (grinder), një telefon celular dhe dy qese për paketimin e substancave.

“Në lidhje me rastin e lartcekur, pas konsultimeve me prokurorin kompetent, personi i dyshuar është arrestuar dhe, me vendim të prokurorit të Prokurorisë Speciale të Republikës së Kosovës (PSRK), është dërguar në mbajtje,” thuhet në raportin e Policisë.

Autoritetet kanë njoftuar se hetimet po vazhdojnë për të përcaktuar detajet e mëtejshme të rastit dhe për të verifikuar qëllimet e të dyshuarit.